27.03.2020 На малой радзіме...

Сустрэчы з чытачамі з нагоды юбілею, якія Анатоль Зэкаў распачаў у сталічнай бібліятэцы імя Янкі Купалы, ладзіліся ва ўстановах культуры і адукацыі Мінска і іншых рэгіёнаў нашай краіны, а завяршыліся на роднай яму Будакашалёўшчыне.

У  гісторыка-краязнаўчы  музей, дзе і ладзілася  імпрэза, падрыхтаваная супрацоўнікамі цэнтральнай раённай бібліятэкі, павіншаваць земляка, ганаровага грамадзяніна раёна, прыйшло шмат аматараў паэзіі. Песнямі віталі госця самадзейныя артысты, а паэтычным словам  —  паэты  Вольга  і  Мікалай  Сукаватыя,  пераможца  рэспубліканскіх і міжнарожных конкурсаў Мая Галіцкая. Асабліва ўсцешыла Анатоля Зэкава сваімі вершаванымі радкамі юная аднавяскоўка Ганна Казакевіч, творы якой былі змешчаны ў раённай газеце «Авангард» і часопісе «Качели».

Віншавальны адрас шаноўнаму юбіляру ад  Буда-Кашалёўскага райвыканкама і раённага савета народных дэпутатаў зачытала і ўручыла Наталля Кісялёва.

"ЛІМ", 27 сакавіка, 2020

Мікіта БЯРНАЦКІ

20.03.2020 Колеры світанку

Як змярканне пераходзіць у ранішняе святло? Гэтаму прысвечана фотавыстаўка Наталлі Алейнікавай «Пейзажы Беларусі “Світанак бяжыць... у азёрную хвалю!”», якая адкрылася ў мінскай бібліятэцы № 10 імя М. Мінкавіча. 

Творчы праект паэтэсы і  мастачкі складаецца  з работ, што адлюстроўваюць прыгожосць світанку праз  фокус камеры.  Фотаздымкі  зроблены  аўтарам  у вяснова-летні перыяд у ваколіцах Мінска.

—  Я  натхняюся  прыродай,  —  расказала  Наталля  Алейнікава  падчас  адкрыцця  фотавыстаўкі.  —  Люблю  бавіць час  у вясновым квітнеючым садзе, слухаючы спевы  птушак. Люблю  гуляць  каля  возера, якое,   па сутнасці, і натхніла на стварэнне гэтага  праекта.  Няхай  не ўсе работы змясціліся ў экспазіцыю, але, спадзяюся, менавіта гэтыя творы абудзяць радасць і светлыя  пачуцці,  якія  могуць узнікнуць толькі ранкам.

Змярканне, ранішняе святло, спакой прыроды — асноўныя матывы твораў Наталлі Алейнікавай. Адмысловыя сюжэты таксама ствараюць высакародныя лебедзі,  якія  мілуюцца ў світальных хвалях; заранка, якая сустракае яшчэ адну раніцу, возера, што квітнее раскай...   Аўтар адзначае: усе  фотаздымкі прадстаўлены ў арыгінальнай колераперадачы. Пазнаёміцца з экспазіцыяй можна да 10 красавіка.

"ЛІМ", 20 сакавіка, 2020

Яўгенія ШЫЦЬКА