Маіх радкоў няма без Беларусі

Юбілей літаратурнага класіка –  гэта не проста юбілей аднаго чалавека ці нават асобнай нацыянальнай літаратуры, гэта юбілей народа, бо з лёсаў лепшых сыноў айчыны складаецца лёс Бацькаўшчыны.

 Да 140-годдзя з дня нараджэння Якуба Коласа 15 лістапада ў бібліятэцы №7 прайшоў літаратурны вечар-прысвячэнне “Маіх радкоў няма без Беларусі”.

 У якасці ганаровага госця мерапрыемства была  запрошана Вера Данілаўна Міцкевіч, унучка знакамітага класіка. Яна прэзентавала  кнігу «Табой я жыў, табой жыву…», якая прысвечана жонцы Якуба Коласа – Марыі Дзмітрыеўне Каменскай. 

Не змоўкне голас песняра, пакуль ёсць людзі, якія звяртаюцца да яго паэтычнай спадчыны.  Аб цікавых фактах з жыцця Якуба Коласа ўсім прысутным распавялі паэты-землякі славутага песняра: Яўген Хвалей, Дзмітрый Дземідовіч, Аляксандр Камароўскі, Васіль Шырко.  

Вялікаю асалоду слухачам прынеслі  музычныя кампазіцыі,  якія выканаў ансамбль цымбалістаў “Музыкі” школы мастацтваў №10 імя Глебава. Вобразна і эмацыянальна прадэкламавалі вершы Якуба Коласа ўдзельнікі  паэтычнай студыі “Рытмы сэрца”. Вучаніца сярэдняй школы №134 Вільтоўская Паліна прадставіла пераклад на рускую мову верша Якуба Коласа.

У завяршэннi свята вядучая мерапрыемства Іна Фралова прапанавала  віктарыну па жыццю і творчасці Якуба Коласа.

Мерапрыемства, якое адбылося з нагоды юбілею беларускага класіка, стала знакавым і паказала глыбіню і самабытнасць беларускай культуры і мовы.