Паэтычная вясна ў бібліятэцы імя Л.М. Талстога: творчая сустрэча з Вольгай Паўлючэнка

У бібліятэцы-філіяле № 1 імя Л.М. Талстога адбылася творчая сустрэча з беларускай паэтэсай, членам Саюза пісьменнікаў Беларусі Вольгай Паўлючэнка (Норынай). Пройдзены майскі вечар сабраў у зале шматлікіх аматараў прыгожага слова.

Вясна займае асаблівае месца ў творчасці аўтара: менавіта ў гэтую пару года ўбачыў свет яе першы зборнік вершаў «Пока на свете есть сирень». Сёлета сустрэча мела яшчэ адну сімвалічную нагоду — 15-годдзе з дня выхаду кнігі «Городская трава».

Спецыяльна да мерапрыемства ў бібліятэцы арганізавалі кніжную выставу. На ёй былі прадстаўлены як зборнікі самой паэтэсы, так і выданні, над якімі Вольга Міхайлаўна працавала ў якасці рэдактара і карэктара (сярод іх — «Пакуль б’ецца сэрца…» і «Калі цвіла чаромха»). Госця падзялілася ўспамінамі пра працу над анталогіяй «Поэзия русского слова», выдадзенай Нацыянальнай акадэміяй навук Беларусі, і распавяла пра знакамітых калег, з якімі яе звязаў творчы лёс — Міколу Чарняўскага, Алеся Бадака, Людмілу Рублеўскую, Віктара Шніпа і іншых.

Прыемным сюрпрызам для гасцей сталі відэафрагменты з мінулых выступленняў паэтэсы, а таксама песні на яе вершы ў аранжыроўцы вядомага кампазітара Леаніда Шырына. Вольга Паўлючэнка таксама прадставіла прысутным кіраўніка народнага клуба «Жывіца» Ірыну Карнаухаву і кіраўніка паэтычнай суполкі «Десяточка» Валянціну Акулёнак. Творчы вечар завяршыўся прыгожай традыцыяй — запальваннем свечкі, якая напоўніла залу атмасферай утульнасці і сапраўднага натхнення.