У свет ведаў – праз бібліятэку

              4 верасня ў бібліятэку № 21 завіталі выхаванцы дзіцячага сада № 556. Для маленькіх даследчыкаў мы падрыхтавалі цікавы ўрок-вандроўку пад назвай «У свет ведаў — праз бібліятэку!».

              Пачатак навучальнага года — гэта заўсёды хвалюючая падзея, а для нашых юных гасцей гэта яшчэ і час адкрыццяў. Падчас вандроўкі па бібліятэцы дзеці не проста разглядалі паліцы з кнігамі, а адпраўляліся ў сапраўднае падарожжа па краіне Ведаў.

               Мы паказалі хлопчыкам і дзяўчынкам, што бібліятэка — гэта не проста сховішча кніг, а чароўны свет, дзе жывуць любімыя казачныя героі, дзе можна знайсці адказы на самыя складаныя пытанні і дзе кожная кніжка гатовая расказаць сваю гісторыю.

               Дзеці з вялікай цікавасцю слухалі пра тое, як правільна абыходзіцца з кнігамі, адгадвалі загадкі пра літаратурных персанажаў і, вядома ж, з задавальненнем разглядалі яркія ілюстрацыі ў дзіцячых выданнях. Усмешкі на тварах нашых маленькіх наведвальнікаў сталі для нас лепшай узнагародай!