З жывой крыніцы сілы набяруся…

Ёсць такі крылаты выраз: “Беларусь пачынаецца там, дзе гучыць песня…”

Беларускія песні – назаўсёды з намі, і вечныя, як і вечная наша родная Беларусь… Песня беларуская вельмі мілагучная, а мова беларуская – надзіва пявучая, мяккая, ласкавая, у ёй многа чалавечай дабрыні, спагады, чыстай сардэчнасці…

Песню немагчыма пераказаць. Песню трэба слухаць. Песню трэба бачыць. Пра песню можа расказаць толькі сама песня і толькі тады, калі яе спяваюць. Народная песня – невычэрпная крыніца мудрасці і таленту нашага народа.

Чароўная мелодыя,

Якую не спыніць,

Табою авалодае

У сумнай цішыні.

І сэрца ўміг зацёхкае

Вясёлым салаўём.

І песня – птушка лёгкая –

Як толькі запяём…

10 красавіка ў Цэнтральнай бібліятэцы імя Янкі Купалы адбылася фальклорна-этнаграфічная гасцёўня “З жывой крыніцы сілы набяруся…” Кожнае свята, асабліва фальклорнае, гэта тая гаючая крыніца для душы, якая заўсёды абуджае вясёлы і добры настрой.

На нашу гасцёўню завіталі маладыя таленты – вакальныя ансамблі харавога аддзялення гімназіі-каледжа мастацтваў ім. І.О. Ахрэмчыка.

Нашы госці падрыхтавалі незвычайную і вельмі цікавую канцэртную праграму “У рытмах вясны”. У зале гучалі класічныя творы беларускіх і замежных кампазітараў, прыгожыя і мілагучныя беларускія народныя песні, а таксама апрацоўкі беларускіх народных песень.

Увазе чытачоў супрацоўнікі бібліятэкі прапанавалі кніжна-ілюстрацыйную выставу “З жывой крыніцы сілы набяруся…”